Windows Live Hotmail

Windows Live Hotmail: "اللحيدان"

هـــالصيف ... غـــير :)

تعودت كل صيف أقضيه في أمور ما تتعدى الخمول .. الرقــاد لي نص يومي ، والأكل .. ولا أقعد مع بنات الخالة تلفزيون وأفلام ولة نفتر شوي في الأسواق والمجمعات .. وفي الليل سهر لنصاص الليالي هذرة وبعد أكل..
هالروتين الفاشل يذبحني ويحسسني باللامعنى 3 اشهر من حياتي .. ياربي شهالحالة
وكل مايات أمي ولة وحدة تعرض علينا نشارك بمركز إسلامي ولة جمعية تربوية ودروس وجذي نرفض وبشدة ونقول مال مطاوعة مانبي ..!!ا

عاد أمي الله يهداها كل شي عندها حفظوا قرآن
.
بس انشالله هالصيف راح يكون غير ومختلف وايـد ، وكل هاذي راجع لجهود الوالدة الجبارة .. وإلحاح من بعض الاخوات..


راح أجسد شخصية يديدة ودور يديد ما قط جربته قبل .. أحم أحم .. بصير مدرسة تحفيظ
الإستـــــــاذة .. " أم صويــلح"

بصراحة . في البداية ما تقبلت الموضوع .. مـابي مـابي وأغلقت القضية وصكيت أذايني


وسواس يجرخ بقلبي .. لوصرتي مدرسة معناته انضباط 3 أيام في الاسبوع لأكثر من 3 ساعات .. بتفوتج طلعات وايـدة وقعدات حلوة مع الربع او وناسة

هاااا .. .؟؟!! الااااااا الطلــعات آنة أيام الامتحانات كنت أضحي بدراستي عشان الطلعة واللحين تبوني أتخلى . لا لا يبا مالكم أمل ..

هالوسواس قاعد يزرع بقلبي مزيد من السلبية وعدم التقبل .. لاتصيرين ماعليج منهم .. انتي مو قدها .. يكرفونج وبس أوامر .. يهال صغار ماراح تستحملينهم .. قعدة في مكان واحد مدة طويلة .. خــــلاص خـــلاص ودي لو هالصوت يسكت بنفسي .. بنفجر .. أتجاهل الموضوع .. و أنساه ..
مرت أيام ناسية فيها طاري التدريس والمركز
بعد جم يوم .. تلفوني يرن .. رقم غريب .. يه من بيكون يعني ؟؟ خبري تلفوني مايرن الا بالياالله
يه يه استبشر خير .. خلني أجوف شسالفة
ألـووه .. السلام عليكم .. وعليكم السلام والرحمة .. الصووت موغريب .. استوعب والا مديرة المركز داقة علي
وللللي .. شكلنا متوهقين متوهقين ماااالي مفر.
هلا " أم صويلح " حبيت أخبرج باجر بيكون عندنا اجتماع في المركز واتمنى انج تحضرين إنتي والوالدة .. هااا .. شسالفة ؟؟ انشالله انشالله أكيد صار ، يزاج الله خير ... وياج ، مع السلامة

حزتها حسيت بإنفجار قوي وده يطلع من جبدي .. فوقه ضحكة صج مووقتها .. مادري أضحك اطنقر آصيح .. يمــة أشسويتي فيني والله مايسوى علي .. آااخ منج يالغالية .

ياتني أمي تطالعني خاشة ضحكتها .. "غلبتج" ..
خلا الفاس طاح بالفاس ومالي ويه أقولهم لا

أقولها : يمة جذي تسوين فيني والله حرام عليج .. موغصب مابي .. ماودي أكون مدرسة مليغة هياااا يااا أطفااااااااال لنعمل مادري شنووو ... ماااااااابي وه

سكتت شوي لين شافتني خلصت كلامي .. " أم صويلح" فكري فيها من ناحية ثانية ، ربــج يحبج وعشان جذي اختارج من بين واايـد ناس .. إنتي بالذات
فرصة حلوة ووصلت لي عندج أنج تقدمين شي .. تسووين شي له معنى ، وتوصلين هالخير اللي عندج لغيرج من البشر..

كلمــاتها تــرن بأذوني .. صج طالعة من قلب صادق .. فـــــــديتج مامـا أشقد احبج

وبلحظة لقيت هالصوت الوسواسي اللي مسندرني قبل بدأ يخف شوي شوي .. ولقيت في نفسي نبع من الأمل والإيجابية .. ايه صح كــلامها .. ليـش أجوفها من منظور شين وسلبي .. وين راح التفكير الحلو والايجابية
وينها النظرة المتفاءلة الحلوة اللي كنا نتكلم عنها ... !؟!؟!!! ..
بالعكس

ياحلوها قعدة اليــهال .. تحس فيهم بالبراءة ، بالتلقائية ، بشعور طفولي ناعم وحلو والتعامل معاهم قمة في المتعة ، وكل يوم متجدد عن الثاني.
واايـــــة ونــاسة .. مارااح أقول ملل أو ما في شي نسويه .. خصوصاً بعد ماصار عندي هدف .. هالصغيرونـات أهمة هدفي وعشانهم اشتغل وآصير مدرسة واصير اللي يبوونه
بابذل كل طاقاتي وكل مجهود عندي وأطلع كل إبداعاتي .. عشان أنشئ بذرة الخير فيهم ، وأبني فيهم أسس إسلامية قوية تترسخ فيهم حتى الكبر

منوو قدي .. استانس وياهم و أقضي وقتي وفووق ذي أحصل الثواب والأجر من وراهم
تشقق ضحكتي .. الااااااااي يعني مافي شي يرووح علي عالفاضي

يــاربي تعيني على الخير وتقطع عني وسواس الشيطــان اللي مايبيلنا الخــير .




أول الغيث قطرة وأخيراً قبلت ووافقت عالموضوع .. ولكنها مامرت على خير تماماً ;) شرطت عليهم إني ما أدرس الا اليهالوو الصغار يعني روضة ولة أول إبتدائي
بس يكفي إني غيرت هالمفهوم السلبي في نفسي .. اللحين حبيت الموضوع وأقدر أعطي فيه.



باليوم الثـاني ،
جهزت نفسي وحضرت الاجتماع .. مرغمة .. يعني بحجينا (مومن قلب)
وخاصة أني أمي اضطرت انها ماتيي عشان تكون مع اخوي الصغير بالدختر .. عنده عملية .. واضطريت أكون بروحي

وه يــا ربي .. ما دري ليش . شهالاحساس اللي في قلبي .. ماعندي تلقائية في التعامل وياهم ...!!
مديـرة المـركز .. يمكن لأنها كانت جزأ من ذكرياتي قبل في المركز .. كنت أدرس بنفس المركز قبل سنين وكانت نفسها اهي المديرة ..كانت مصدر رعب لي
يبــا ما خاف منها .. بس انطبعت في ذاكرتي صورة جذي

المــهم يلسنا.. ولقيت وايد من ربعي اللي اعرفهم هناك ، بعضهم صارو مسؤلات وفي منهم صارو معلمات.
تمينا نتناقش فترة عن برنامج الدراسة وأسلوب التدريس وتقسيم المجموعات وشوية ملاحظات مني ومناك
ويـــــــــــــــــــات المــفاجــــأة الـصاقعة اللي ماتوقعتها ..
وااااااااي لحقــوا علي .. صرخة من أعماق قلبي تمت مصمووتة (صامتة بفعل فاعل ) .. كــارثة

ماعطيني صف اختي الصغيرة ههههههههه واااااااهااااههااااي ؟؟ .. !!1 شنوو تتطنزون أنتوا ولة من صجكم ؟؟ الله يعيني بس عليها

مــادري .. حزتها حسيت بمزيجة من مشاعر الغضب والطنقرة على ضحكة ودها تفقع من قلبي .. لاااء الا هاذي
الله يهداكم عاد أختي !!!! ...

أختي الصغيرة بالبيت أهي ملجأي الوحيد .. هي أول وحدة افكر فيها لما أحس بملل ولا بدقة ينوون وخبال

سبحانك ياربي .. من بد خواتي كلهم ومع إني عندي ثنتين أجرب لعمري بوايد منها
لكن كتبة ربي انها تكون أجربهم لقلبي .. بيني وبينها 10 سنوات تقريباً .. بووو وااااااايد
لاااا حشة .. من يقول ..؟.. لاوايد ولا شي
محد يفهمني كثرها ، ويطبق الخبال اللي أسويه معاي
لي تمللت أقضبها من إيدها واقعد أرقص معاها بينون ولا ألعب معاها ريــاضة ، حاضرة بكل وقت بس أقولها يلااااا تقولي تقوولي حاضرة ..
صج وناسة وياها ..
ولة الباقي محد منهم يفهم ويحس بهالإبداع الينووني

خخخ توصل أحياانا ً لين اتملل ويصيدني إحباط من موبايلي عاللي صاير جنه غتم مايرن الا بالزور أقولها قومي اتصلي فيني من البيت خلنا نسوولف .. لووووول J
وعلى قولة القاايل : .. الينوون فنون ..

أتوقع اللحين فهمتووني وفهمتوو سبب ردة فعلي ..
بل صج مووشي

اليوم اهوة اليوم الموعود .. وكاهي جربت اللحظة المنتظرة .. لـــــحظــــة الأستــــــاذة المعلمــة " أم صويلح"
وصلت للمركز .. طبعا ونازلة من السيارة نافخة جتووفي تقولون طفاحات مب جتوف وناقصني بس يفرشونلي زولية حمرة عشان الموكب الملكي
دخلت المركز وسلمت على المدرسات .. سجلت حضوري وخذت فايلات بنااتي ويلااا عالصف مشينا.

المفروض اليوم اهوو أول يوم ، يقتصر بس على التعارف وتقسم المجموعات وشوية ملاحظات
هلت أم صويلح وجنها البخت وقعدت ورى الطاولة..

والله من قعدت وياهم وانة أحس بضحكة من الأعمــاق ..حاطين عليها برنووص كاتم للصوت لاتطلع جدامهم وتفقدني هيبتي .. مــاعليكم أخربط
سرحت شوي وخذتني نفسي لذكرياتي قبل .. لأيام الطفولة ... تعودت آيي لنفس المركز .. ولــكن مكاني هناك بين هالطالبات اللي يالسين جدامي .. خجوولة واااااايد وبالياالله تنطق حرف.
كــانو يسحبونا تسحيب عشان نروح وعقب الغربال والصياح والتبجبج نروح .. مادري ليش ماكنت أحب أروح المركز حزتها
ليما كبرت وصرت بالإعدادية .. هني أختلف الجو بالنسبة لي .. لأنهم بدوا يسونلنا دروس تربوية حلوة وأسلوب يديد مختلف
يعني مثلا الليتات (الإضاءة ) مصكوكة وشموع ودرس إيماني نستشعره بهالجو

اييييـــــه الله يالدنيا .. صج كبرنا واركضت فينا الأيام بدون مانحس
صرت مدرسة ، بعد ماكنت طالبة صغيرونــة.

حبيتهم طالباتي واحسهم صاروا جزء من مسئووليااتي
كلما اتذكر أيامي قبل أقوول خلني اغير هالعدم تقبل اللي كنت احسه .. اغير نظرة هاليهاال بالنسبة للمركز ، اخليه مكان يحبون ايوونه بنفسهم مب مرغمين ، يقبلون على القران وكتــاب الله بحب واخليه جزء منهم ومن حياتهم بأساليب يديدة ومختلفة عن السابق.

فكرت إني لو أبدع في اسلوب التحفيظ والتحفيز يعني صندوق هدايا وعبارات تشجيعية .. ومكافأت ولو إني أكره أسلوب احفظ وتحصل المبلغ الفلاني
يصير اليااهل همه المــادة .. كلشي بيزات بيزات همته للفلووس وبس .. !!
قرب العلاقة بيني وبين اليهاال على أساس اني مو مدرسة كثر ما انة صديقة لهم وأخت جريبة .

أصعب مافي الموضوع إني راح أكون نموذج للقدوة لهم .. ومعظمهم حاطني في باله على أساس المثالية وإني معلمة وعارفة كل شي .. !!
بس ياربي تعيني وتصبرني على كل صعب وتلهمني محبة هالشئ والاستمرار عليه
أتمنى إني ماطولت عليكم ، بس خبركم من زمان ماجفتكم وفيني فيعة حجي .
أشوفكم على خير وعسى الله يحفظكم ويحفظني وبنــــاتي الصغيرووناات قوولوو آميــن .

... ...

ليتهم يخترعون مسجلة ولا طابعة خاصة بالمخ .. جان أسجل سوالفي مع روحي كلها

يحليلها روحي والله .. وناسة القعدة وياها

أقعد انة واهية نسولف ، والحلو ثنتينا نفكر بنفس الشي ومتفقين .. مافي أحد يعارض ولا يتحندى

أقولها اللي أبي .. ماخاف أغلط ولا " أقط خيط وخيط"ا

تفهمني وأفهمها .. وتريحني لين أسولف معاها

عاد والله أزعل .. ياكثر ماتطري مواضيع وسالف حلوة ودي أنزلها بالموقع

.. كاسر خاطري الموقع .. من متة مانورته بموضوع يديد

الله يهداااه الألهام قاطعني

بس معذور مو منه .. الإمتحانات جربت وبالي مشغوول وايد

ماقمت أحصل وقت أدندر وأسولف ويااهاا ا

دعواتكم لي يالغاليين .. والله يوفقنا كلناا بإذنه

والله يردك لي يالإلهام سالم

أشووفكم على خير .. دمتم بود :)ب

يااالله تحفظها وتردها لأهلها سالمة

ياربي أدعيك يامكفي المصايب .. ترد ابتهال لأمها بسلامتها

http://3ssom.com/uploader/uploads18/Ebthaal.zip

والله وكبرنا يازمن

حبيتها الصورة هاذي .. صج معبرة .. جني اجوفها تتحجى .. جنها تقول : الحياة دروب طويلة ، وكل واحد يحق له يختار دربه ، وبيده يتخير هالدرب ويسير فيه

هالأشجار الخضرة .. توحيلي بالتجدد. النقاوة .. بالقلب الصافي

وإشراقة شمس يديدة بحياتنا

إي نعم .. إشراقة سنة يديدة بحياتي

وكـــاني كبرت سنة من عمري اليوم .. صرت عيووووووزة والنعم

كبرت الصورة شوي .. زوم .. بعد شوي زوم .. ليما لقيت روحي فيها .. حسيتني قاعدة متربعة بوسط هالطريج ..ويلست أفكر بخاطري

ياربي .. عيدميلادي يعني كيكة ..وشموع .. وأمنيات .. واحتفل .. وخلصنا ؟؟!!ا

قعدت أفكر باللي راح من عمري .. شنو سويت وشنو انجرت بحياتي ؟؟

وشسويت بالأيام اللي طافت ... بشنو غلطت وبشنو قصرت

والحمدلله عدت من عمري 19 سنة .. راضية عنهم

وياربي مابي غير رضاك علي ورضى الوالدة

أشوووفكم على خير :))

... وكل سنة وانة طيبة ...

الحـب

..الحب صار موضوع يشغل بال وايد من الناس .. بشكل أكثر تحديداً يشد مراهقينا .. صار حاجة وضرورة .. لكن .. شنو الحب بالضبط؟

شرط يعني لما نقول (حب) نحط في بالنا .. بنت + ولد .. ريال ومرة .. أنثى وذكر .. بس!!!ا

.. الحب موجود بحياتنا .. بكل مكان .. وبكل زمان .. وتحت أي ظرف كان

.. وأول حب يعيشه الإنسان

... حب أمه

من أول ماينولد ويطلع بهالحياة

عقبها يبتدي يلاقي هالحب في أبوه واخوانه ... في المجتمع اللي حوله .. وأي شي تألفه نفسه يحبه

موشرط يكون إنسان ،، حتة الجماد ينحب .. وفي واايد أوادم يعشقون شي أسمه الكتاب مثلاً

وفي نظري سعادة الواحد ترتبط بهالــحب ..كلما نحب نكون أسعد

.. زين وايد أوادم صارو لما ينذكر الـحب يشوفون فيه المعنى الشين .. يفكرونه عشق العشاق ... من يقوول ؟!! مو شرط

... زين خلوني أقولكم بعد

.. في شي اسمه حب قبل الزواج .. وحب عقب الزواج

أي واحد فيهم تفضلون ؟؟ أكيد كل واحد وله قناعته الشخصية

وبنظري ، ممكن يكون هناك حب قبل الزواج ، وفي وايد أوادم حبوا بعضهم ووصلوا الى انهم ارتبطوا ببعضهم وتزوجوا

وكـــاهي حياتهم سعييدة وماشي تمام التمام

بس .. تبون الصراحة

آنة أشوف الحب قبل الزواج مو مضمون وايد .. بنسبة 50%ا

يعني السالفة ياتصيب وياتخيب

صار الـحب قبل الزواج تقريباً موضة شائعة

!!.. تقولج البنت والله انة ماعرس إلا واحد أحبه

على قولة المثل "الله يعزكم" : أنطر ياحمار لين إييك الربيع

واذا ماحبج أحد ...؟ يطيح حظج وتعنسين ..؟؟!ا

زين هالأخت هاذي ماحصلت اللي يحبها خير شر

غيرها ناس حبوا بعض سنين طوويلة

.. وبالنهاية ..

واحد يهد الثاني >>> تملل منه ( مايعترفون فيها بصراحة بس هاذي اللي قاعد يصير) ا

ولا ظروف أقوى منهم فرقت بينهم

... والنتيجة ؟؟

ألم وهم بقلوبهم . وتحطم بالنفسية وكـــارثة .. أشحاادنا نسووي بعمرنا جذي ..!ا

عني آنة .. أمشي على أساس (( كل شي بكتبة رب الـعـالمين)) وكل واحد وله نصيبه

واللي ربي كاتبه لي آخذه

إشرايكم ندخل حب المقصة (حب التشلخ) في سالفتنا ؟

تلاقي الصبي بس يبي بنت تقزورة .. علة قولتهم قصيرة الأمد

فترة معينة ويهدها .. وأحيانا هالقصيرة الأمد تصير شلخة بو سنين طوويلة كلها جذب بجذب

انة أجوف بالجامعة صار عندنا ليلام .. كل واحد عجبته وحدة بس عطاها الرقم وتعرفوا .!!!!!!!!ا

الموضوع بهالسهولة .. والبنت صارت رخيصة

:) على عكس اللي محترمة روحها .. غــالية مثل الدانـة مو أي واحد يقدر يحصل عليها

خلووني أقولكم عن هالسالفة اللي صج باطة مرارتي .. ولة أبذمتكم من يصدق بنت تلاحق صبي تبي تتعرف!!ا

ياجليلة الحية استحي شوي

;) أقلها اهي جريمة بحق الصبي .. لأنه الله يسلمج من آداب المغازل إن الصبي يبتدي بالترقيم

حلاتها البنت تكون خجولة .. من شافها الصبي نزلت راسها مستحية .. وأحمر ويهها .. مو بنات اللحين تطالعه عيني عينك وجنه العيد

ماصدقت على الله يشوفها .. صج طايحة حظ

زين يابعد جبدي أعجبج ..؟ أووكي ماقلنا شي .. قوولي يالله عجبني وأبيه أو أبي مثله .. خليها بينج وبين ربج وأدعيه يرزقج اللي تبينه .. ترى الله يسمعج بكل وقت وعمره مارد دعوة أحد

مو تروحين بقوة عين .. تسحبين الصبي غصب .. عجبتني وأبيك ..!!ا

ليش داشة سوق المقاصيص انتي ... ؟؟

واللي يزيد بطة جبدي .. لمن يكون هالصبي مستحي بمكانه .. مستنكر هاللي تقوله ورافضه .. اشفيها ذي مو صاحية ؟؟

الصبي ربي هاديه .. ماعنده سوالف .. يبي يفتك منها موقادر .. واهية لا .. لازقة فيه لزقة عنزروت

حبيتها ردة فعله .. وأقوول يالله تكثر من أمثاله وتعقل شبابنا وتهديهم

كالشموس أشرقي

للمنشد إبراهيم السعيد

حصلتلكم الكليب

http://rapidshare.de/files/13618148/asriqi_dam3a.wmv.html

اما النشيدة

http://www.manarh.net/ashrqe/1.mp3

.. انشالله تعجبكم

وهاذي رابط ثاني

http://www.forum.eyelash.ps/showthread.php?t=27160

اذكر بوحدة من المحاظرات .. اللي كانت تتكلم عن نفس موضوعنا اليوم

كانت المحاظرة تقول .. أدعو من اللحين .. بصلاتكم .. بسجودكم أسألوه رب العالمين .. شلون تبينه شريك حياتج ..؟ أدعيله ربي يحفظه وأدعي لعياالج .. وقولي كل شي تبينه ترى باب الدعاء مفتوح

بصراحة .. استغربت فالبداية .. السالفة يديدة علي وشوي تضحك

وبس منها صرت دوم أدعي ربي يرزقني الإنسان الصالح الخلوق الدين ،، ادعي حق عيالي ربي يحفظهم ويهديهم .. ا

وعلى هالطاري .. سالفة وحدة من البنات .. تقول كانت دوم تدعي ربها يرزقها انسان صالح .. تدعيه يوميا ربها يحفظه ويسلمه من كل شر .. كانت متعودة تسجل كل شي تسووي بمذكرتها

ومرت الايام والسنين .. وكتبلها ربي الزواج

عاد واهي قاعدة معاه تراويه مذكرااتها والا تطيح عينه على التاريخ الفلاني .. كانت مسجلة انها صلت ودعتله وهلون

جان يقولها مانسى هالتاريخ بحيااتي .. في هاذي اليوم صادني حادث قوي كنت انة ورفيجي بالسيارة ودعمنا

رفيجي توفى بالحال .. وانة ربي سلمني

سبحان الله .. سبحانك ياربي

_____________________________________

أما الحب عقب الزواج ... فهو الحب اللي يتولد مع العشرة ، هالحب صادق ومضمون100% ، تجمعهم العشرة الحلوة والعيال .. وتجمعهم طموح وأحلام مشتركة بينهم

جدامهم الحياة تشكل تحدي يخوضونه .. وكل واحد فيهم يكون سند للثاني ..

أعز قلب .. وأعز صديق .. واعز شريك لقاه بحياته

يصونه ويحطه بعينه ..

وأخيراً

الحب لابد يكون له هدف .. ومعنى .. وأحط خطين تحت هدف ..

عشان جذي فضلت الحب اللي بعد الزواج من بدهم كلهم .. لأن لهم هدف ورؤية يطمحون لتحقيقها وهي أسرة سعيدة وذرية صالحة وهاذي هي الحكمة من وجودنا بهالحياة

أما لما إيي يقولها أحبج .. وهي أحبك .. !!!ا زين ليمتة ؟؟؟ قاعدين تضيعون وقت بلامعنى .. وبالأخير تمللوا لأنه مافي شي يسوونه غير الحجي أحبج وأحبك ...... وحبتكم القرااااادة لوووول

هاذي كل الي عندي لليوم .. أشووفكم على خير

الدنيا حلوة .. وتفاءلوا بالخير تجدوه

التفاؤل.. كلمة حلوة .. تجمع بيت حلاوة الكلمة والمعنى ، وأحلى مايميزها إنها تحلي حياتنا وتجعل في نفوسنا دفعة من الأمل

وتخلينا نتجاوز كل صعب بحيااتنا .. بمفعولها السحري

ورسولنا الكريم يدلنا على هالصفة الحلوة .. التفاؤل ....يقول رسولنا .. قدوتنا : " تفاءلوا بالخير .. تجدوه"

ا

إي نعم تجدوه .. ولكم مني (قرنتي) تلاقوونه

جعلت من هالكلمة هدف وأساس بحياتي .. وصفة حلوة اكتسبتها .. وبالفعل لقيت بنفسي رااحة وطمأنينة .. غيري يسميها بروووود أعصااب !!!!ا

.. بكل أمر من الأمور خلونا نتفاءل .. نتوقع الأفضل والأحسن .. ونحمد الله ونشكره على كل كبيرة وصغيرة

".. وعسى أن تكروه شيئاً وهو خير لكم .."

خلونا نتفكر بهالآيات والأحاديث .. في أحلى من هالدين ؟؟!ا

. صدقو يوم سموه إسلام . دين السماحة والسلام .. طيبة وتفاءل ويدعو الى كل خير

واذا عصلق علينا أمر من الامور نلاقيه ربنا حااضر وموجود .. مايردنا .. نقدر نستخيره وندعيه بكل وقت .... في أحلى من ربي ؟؟؟

طبعا ماني كاملة .. والكمال لله .. أحاول انه

يكون هالتفاؤل بكل شي بحياتي .. ولكن .. أبقى انساانة

يمكن الشي الوحيد اللي صعب علي أقول متفاءلة فيه تماماً ------> موضوع الموت

. لأنه بالفعل موضوع يحز بخاطري .. يألمني .. هالموضوع بالذات .. وكاني احاول أغير نظرتي له

اللي مريت فيه بحياتي .. جعل في نفسي الموت عقدة

لا لااااا لااا أشدعووة مو لهالدرجة .. الإنسان المؤمن مايفكر جذي

بس تقدرون تقولون صارت نفسي تتحس منه

يضيق صدري لين يابو طاريه .. ويامسرعها تنزل دمعاتي لي قالوو فلاان ولا فلانة مريض بالفراش .. تفكيري علطوول يروح للموت

مع إني أدرك بقرارة نفسي إنه حق علينا .. وإنه مردنا ومصيرنا

.. وأدري إن الموت ممكن يكون حلو عند ناس ، ومو حلو عند غيرهم

. وبيدنا نغير هالشي دامنا للحين عايشين .. والروح بعدها ماغرغرت

.. بس تدرون

هم أفكر .. هالموت صار رادع لي .. وسبب كبير في هدايتي

كل مابغيت أعصي ربي .. افكر فبعدين .. أقوول انة وين أتحمل هذاك العذاب وحر جهنم سنين طوويلة ؟؟!!ا

.. ويقووول المثل ياامااشي درب الزلق لاتآمن الطيحة ..

الواحد يمشي بالصح ويحفظ رووحه من اللي ياااي .. ولة انة غلطااانة ؟

فدنيتي .. الـموت سبب في هدايتي

يقول سبحانه جل جلاله :( واصبر نفسك مع الذين يدعون ربهم بالغداة والعشي يريدون وجهه ولا تعدو عيناك عنهم تريد زينة الحياة الدنيا ولا تطع من أغفلنا قلبه عن ذكرنا واتبع هواه وكان أمره فرطا)ا

سبحانك ياربي .. الإنسان المتفاءل تلاقيه يبين من ويهه ..سموح .. بشوش .. يشرح القلب .. وله الناس ترتاح

على عكس المتشاءم .. اللي يشوف بكل موضوع النقطة الشينة .. ياربي شهالويه اللي يسد الجبد

. عبوس .. تحس الكشرة تصير منه وفيه .. ومن تشوفه الناس تشيل عليهاااا

برايكم شالحل مع هالمتشاءم ..؟ شنسوي فيه

التفاؤل يولد دفعة من الأمل بنفوسنا .. في وقت ضاق

ت فيه الدنيا علينا وانسدت كل الأبواب بويوهنا .. الا بابه سبحاانه .. مبطل بكل وقت

أحيان تصيبنا مواقف وأشياء تضايجنا .. نقول ياربي ليش يصيدنا هلون ..؟! ليش بس احنا من بد كل هالنااس

يالحساااااااااد بسكم عاااد ويكفينا ربي شركم يالحساااااد

زين ياخووي وياأختي .. ليش تفكرون هلوون ؟؟ شوفوها من صوب ثاني .. وبنظرة أحلى ولا تعورون قلوبكم ولاهم يحزنون

وخلوني أجووف ضحكتكم هاللي تونس :) اا

جيييييز

وتذكروا إن أي مصيبة تصيب الإنسان إنما هي ابتلاء من رب العالمين .. وربي مايختبر من عباده الا اللي يحبهم

ربك يحبك .. يه يه يه .. من قدك ومن قدج ياخوويتي

واذا الله خذ من عبده شي فتأكدو إنه راح يعوضه بأحسن منه..المووضوع كلة صبر وثقة برب العالمين وتفاءل

هالمفاهيم اللي تنقال ماهي مجرد حبر على ورق .. احنا محتاجينها تكون فعل بحيااتنا

والله ينور عليكم حيااتكم ويسعدكم امــين يــاربي

. و من أحلى الكتب اللي قريتها بهالموضوع .. " كتاب لاتحزن " للشيخ عايض القرني

.. أحسها حياتي بالتفاءل مثل الوردة الندية ،، لها ريحة وأثر طيب على نفسي ..

وهـــاذي نشيدة الحسيان ... ( تفاءل) من ألبوم مرايا

نشيدة روعة بكلماتها انشالله تعجبكم

http://www.abu-hamza.com/?p=181

واللي يبي يحملها ... تفضلوا

http://www.nahham.com/audio/Tafa2altu.mp3

.. تلفزيون ماماعودة ..

تلفزيون يدتي المعمر .. صاار له سنين يقااوم والحمدلله للحينه عايش بكرااامته :) ا