ودكم تسمعون مني ذكريات أول ؟؟ حياكم الله
أيام حلوة .. بالنسبة لي زمــان أول واايد أحلى .. وكل شي قديم له طعم ولذة
أيام القرقاعون ،رمضان أول، العيد ، يوم اليمعة ، يمعات الأهل ، قعدة اليدات وسوالف العيايز ، لعبنا في الفرجان
الله عليك يازمان العتيج
ياليتني أرجع صغيرة وأعيش مرة ثانية بهذاك الزمان
تحضرني في بالي هذيج الحياة الحلوة .. البسيطة ، ومع إنها بسيطة بس حلووة
ولو إني مالحقت وايـد على ذاك الزمان أيام فريج صوووووووووويلح وفرجان الاول بس في قلبي حنين للماضي وهذيج
الأيام وميل مووطبيعي الى ذيج الحياة
الواحد فيهم يقوم مصبح على ذكر الله .. على لا اله الا الله .. يسترزق الله والحياة ماشية ..
عايشين بقناعة ورضى ، وكل ماياهم رزق ونعمة حمدو الله وشكروه ....
ولمن غابت الشمس وانتهى يومهم ..ارقدو بفراشاتهم شاكرين رب العباد وقلوبهم تنبض حب وراحة وحمد وشكر
هاذي يسمونها عيشة الهنى
....ايييه عااد موب مثل اللحين أسرة وكولتات والأيسي مبطل في ويوههم
ياحلوها رقدة السطوح .. مصففين فراشاتهم ويضربهم هوى الشمال .. وبالحر أنفقصوا ولا عاد البحرين والكويت .. الحر عندنا يذبح
ياحلوها المناسبات والأفراح لين صار موعدها .. والقرقاعون ويوم العيد ، وحتة اعراس قبل لها مزة وطعم ثاااااني
على بساطتها لكنها غيررر غيرر
أيام رمضان)ا)
بديت أصوم جدياً من ثاني إعداادي على ما أظن .. ولا قبلها كنت ينية لووسة .. ما أطيق أجووف جدامي اللقيمات ولة الكباب
افتر واتحرى اللحظة اللي أمي تكون فيها لاهية ، وأمد يدي وآكل يممم شغل عدل ياناااس ويعطيج العاافية يارووزي ..>>خداامتنا قبل
وفي المغرب كنا نتيمع كلنا عالسفرة .. وبالأجازة ايوونا عماتي وأعمامي .. أحلى شي لمة رمضان
نروح كلنا مع بعض نصلي التراويح بالمسيد والميلس مترووس ريايل يقرون القران .. صج المكاااان منووور بذكر الله
وبنص الشهر ايينا القرقاااااااعون .. آية عليك ياقرقاعون
أشوة لحقت على القرقاعون الأصيل .. مو مال بو أزقرت .. حتة الكشخة والرزة اربطوها بهالأشية التراثية .. صدقوني والله تراثنا وعاداتنا أهية الكشخة بعينها
كنا ننطر بس تفج الصلاة ولا اليهال تارسين الشوارع ، الصبيان لابسين ثوب وقحفية والبنات يحليلاتهم بالبخنق والجلااابية
عاد ولا يدتي الله يذكرها بالخير .. تشرع باب بيتها على اخره ، وتحط كرسيها عند الباب تقعد توزع قرقاعون على اليهالووو
مااميش خدم .. لايبا .. لا ..حتى الكــبار ويانة
أتذكر حزتها نتيمع مع عيال عمي .. ونجهز طبولنا .. ويالله مشينا
...ندور الفريج من بيت لي بيت.. داعوس داعوس.. لين نترس الجيسة حدها
وبآخر الشهر يصير يوم الويدااع ... وااااااااية حمستووني والله
عقب صلاة اللعشة تتيمع العيلة بكبرها عمات وأعمام وأحفاد والكل كلنا في بيت ماماعودة ( رحمة الله عليها) ا
يصير أحتفال بمناسبة انقضاء شهر رمضان على خير . .. يقرون دعاء ختم القران وكلهم ينشدون ويداااع رمضاان
.. الويداااع .. الوداااع ياارمضان ... علييك السلااام ياشهر رمضان
وبنص الليل يطلعون عيال الفريج يسوون احتفالاتهم وطبول وطقطقة ومكبراات صووت .. ونااااسة
وبنهااية اليوم .. نكوون حدنا تعابة .. وينك يافرااااش
زين هاذي بعض المناسبات .. عيل شكنا نسوووي بالأيام العادية ؟؟
انة أقوولكم
ربعي كانو عيال عماتي وأعمامي .. شلة عوودة كنا . نتيمع كل أربعة وخميس ويمعة
..أذكر بالعصاري كنا نتيمع جيش بنو عنترة كلنا وعالبراادة ياشباااب
نينن راعي البرادة عن خاطرنا .. وبالردة نمر على إمام المسيد اللي بطريجنا .. نغربله شوي واحنا رادين البيت
هههههههههههههههههه ذكرتووني
ساعاات كنا نمر على عمارة يدي نلعب لعبة .. خووووش لعبة والله
نركب لي فوق السطح ونصطف ورى بعض .. اشكثرنا مسووين سااتوول .. وكل واحد ينزل يطق كل جرس يمر عليه من فوق العمارة لي تحتها
جووفوو شقد ينطق الجرس الوااحد يعني
خخخخخ
ويطلعون لنا الأواادم اللي بالشقق مطنقرين حدهم . ويااالله شلنا عليها لووووول
كنا بعد نلعب لعبة السيليلنقوو ..هاذي لعبة هنوود أظنتي .. خخخ عاد جوفو من فينا متعرفله على هندي وقايلة عنها
هاذي اللعبة عبارة عن جم من قوطي نلقطهم من الخرابة اللي مجابلتنا وكورة صغير
نركب القواطي فوق بعض ومن بعيد نفلعهم بالكورة واللي يطيحهم نركض ورااه نفلعه بالكوورة .. هههههاي .. هاا تلعبونها .؟
صج ليقالو هنوود ..!!!ا
من أحلى الألعاب اللي كنا نلعبها واللي صج أحبها ... الخشيشة ..... هاذي لين صادونا الأهل ودخلونا البيت نلعبها
..اللي بخيشة العيش ، واللي بالغسالة في الحمام ، واللي بكبت يدتي ..
أمااكن ماتيي عالباال
وأخيراً
من اهم أعماالنا التجارية .. أحم أحم بنووو عنترة طلعووو فالبزنس عبااالكم
نرووح عند قلعة عراد نصيد القباقب الصغاار .. "ماعرف شيسمونهم" ... ونفرشلنا بسطة عند بيت يدتي في السكة نيلس نبيعهم ههههه
....أقوولكم خيسنا الفريج والأحلى محد منهم فكر يشتري منا
ايييه على قوولة القاااايل : " ليت الشباب يعود يومــاً " وليتها الطفولة تعــود ونعيشها من جديد .. نرد للبراءة
...بس تدروون
انشالله نرد لها لي صار عندنا عيال ونعيش معاهم هالأيام مرة ثانية
والنقطة الأهم أهية ترااثنا .. أتمنى انه مايضيع تراثنا الغالي مع تقدم الزمـان وتوسع الحضارة
فديتك يازمان الاول .. وفديت زمــان الهوويامال
...وهاذي صورتي
تفهمني وأفهمها .. وتريحني لين أسولف معاها
