..ملفى الأياويد ..

Sunday, April 30, 2006

..كـل غلاتي..

غلا روحي .. أمي .. أبوي
من أول ماوعيت على هالدنيا تفتحت عيوني على أحلى اثنين .. صج ألاقيهم بعيني أغلى مانوجد بدنيتي .. وأول حب عاشه قلبي بصدق
أبوي حبيبي ، يرحمه ربي ويغمد روحه الجنة ... وأمي الغالية يحفظها الرحمن ويعطيها الصحة والعافــية.
:eb9ara7a يقول الأخ
أحبها ..اللي مثلها لازم تنحب .. ومقتنع انها متميزة ،، وغيري هم يحس إن اللي عنده المتميزة .. أحلف انها اول من حبيته .. وماازالت الأولــــى
أدعيلها بصلاتي وأحس اني مهما سويت فماراح أوفيها الحق اللي يتوجب علي .. أبد
صدقت والله .. صح لسانك
كلمات تحسونها طالعة من قلب صادق ، وكل قلب ينبض بهالحب
وااااااااااااية فديتج يايمة .. عسى الله لا يحرمني منج
وفدييتك يابوي يانظر عيني .. انشالله ربي يجمعني معاك بالجنة .. آآآمييين يارب العالمين
تاخذني الذكريات لأيام الطفولة ، اتذكر فيها الغالي في كل موقف يمر .. مـــانسـاك يايبة حتى لو خذاك الموت عني
كان لي اعز صديق .. وقتي كله معاه .. كان يشوف فينا أمل ومستقبل واااعد وطمووح .. ( واااحشني حييل بابا)ا
مرت على وفاته سنين طويلة .. وللحيني أجوفه بكل ركن بالبيت . أحس بريحته .. بكلماته .. بسكناته وحركاته
لين أدش الميلس .. أطالع بالزاوية .. هني كان كل عصرية يقرى القران .. ويوم بغيت أطلع من البيت .. اطالعه عند الباب مستعيل يلبس دلاااغه .. ابتسم وأضحك ....بابا وينك ...؟!ا
أتذكر أدق تفاصيله.. خطه وأهو يكتب .. ريحته للحينها فبالي .. حتة البرتقااااالة شلون كان يقصها أتذكر..!!ا
هذاك اليوم يالسة مع أعمامي فبيت يدتي . طبعاً عندنا من عقب العشة عاادة .. لازم يحطون صينية الفواكه ..
على قولة يدي "فيلق الخامس" ... لووووول والله انتيكة يدي
يا عمي يبي يقص البرتقالة .. بس قطعها 4 قطع
قييب ، هاذي شلون ناكلها .. عمووو خف علينا شووي
أقوله عمي :سوها بو 6 قطع مثل ماكان يسويها أبوي ...
تغير ويهه .. سكت ..وبلع ريجه
ابتسم ... يقولي مشالله عليج للحين تتذكرين شلون كان يقصها..!!ا
هالأنسان كان لي أكثر من أبو .. صديق عزيز .. وأغلى قلب عرفته
بيني وبينكم ساعات أحس اني احبه اكثر من أمي ... :) مو يقوولون البنت بنت أبوها
كان كل صبحية ياخذني آنة وأخوي وأختي بالاجازة نروح المكتبة العامة نقرى ... تحسونه كان مخطط بمخه .. يبينا نكون شي له قيمة بهالحياة .. دووم كان يشجعني
كان القوة اللي تحرك كيااااني وطموحي ( اشدعوووة محرك البخاار هههااي) ا
إي والله طموحي .. واللي زرعته فيني يايبة لازال فيني
أشوفه لي قدوة .. وشخصية حلوة مميزة خلدت في ذكراتي ، مختلف بأخلاقه وحرصه على دينه ..
عمره مارضى بالغلط ولا سكت عنه .. وللحينهم الناس يذكونه بمواقفه
كان سحابة الخير اللي ظللتني ورعتني في حياتي .. وهذااني يايبة الزرعة اللي زرعتها وربيتها .. أبد ماراح أخذلك وانشالله انة دوم رافعة راسك بين الناس
استانس واايد وافرح ليقالو الناس بنت فلان .. يبة يزااتك مالحق أوفيها ..
وييين الدنيا اول لها معنى .. حلوو طعمها . وبلحظة تغيرت وصارت ماصخة ..!! ولة انتو شتقولون ؟
يقول رسولنا الكريم بما معناه .. إن الواحد فينا يعيش بالدنيا كالمسافر .. اللي لقى شجرة واستظل تحت ظلها ثم .. ثم رااح وتركها
واللي يعرف الديث يقووولي اياااه لأني مت ابي اتذكره مو قاادرة
أمي .. هالغالية غير وغير وغير ... وين تلاقون مثلها بهالزمــان ...؟!ا
بعيوني غلاتها أكبر مماتتصورون وماتخيل دنيتي بدونها .. إهي أملي الوحيد الللي بقى بهالدنيا
اشوفها مثال للوفى في زمن قلٌ فيه الأوفياء ..وأم صج ربتنا على الخير والأخلاق..
تحملت الشقى سنين وذااقت الويل معانة
"آنة بصــراحة اسميها "الأم الحديدية
قبل سنين كانت معززة مكرمة .. مسؤليتها ماتتعدى بيتها وعيالها
أظن حزتها ماكانت تتوقع بيوم ممكن تنقلب الموازين ويتغير الحال
عشــان جذي يقولون حمدوا ربكم على كل شي .. وربكم يقول:( ولئن شكرتم لأزيدنكم ).. عدل ولا مو عدل ؟
وبالنهااية راضين بقضاء الله وقدره
تستاهل والله ينقالها الأم المثالية ... ولج بووسة عالراس يالحبيبة ..
وصج كرموها بأحد الأحتفالات كأفضل أم مثاالية
يحفظج ربي لنا يالغالية .. ويحفظك يابووي حتة وانت بقبرك ويغفرلك ويرحمك
ولقــانا انشالله بالجنة كلنا ..
..أحبكم..

استهلت وأنورت


نبدأ بسم الرحمن الرحيم
السلام عليكم والرحمة ،، وحيالله بضيووف صفحتي الطيبين
هاذي أول تجربة لي في عالم البلوق
انشالله تعجبكم سوالفي ومواضيعي
أتمنى انكم تشاركوني فيها وتتفاعلون معاي
على أمل ان نلتقي بكم قريباً
أشوووفكم على خير
.......


 
Free Site Counter
Free Site Counter
Launch in external player